Matur millum umførini

Til undanfarnu kapping bleiv bjóðaður matur bæði leygardag og sunnudag. Stutt er millum umførini, og talvini kunnu gerast long. Tí hildu vit, at tað riggaði sera væl við góðum mati á talvstaðnum. Vit hava avgjørt, at hetta verður gjørt aftur til komandi Janus Open.

Vit eru so hepnir, at Henrik Sommer frá Sommer Matveiting aftur kemur at standa fyri matinum hesaferð. Fleiri høvdu á orði, hvussu góður maturin var seinast.

Nakrar mánaðir eftir kappingina vitjaði Hansara Hátign Fríðrikur kongur á Eiði, og tað var júst Henrik Sommer, ið fekk heiðurin at gera matin til Hansara Hátign. Vit vita ikki við vissu, hví hann fekk henda møguleikan, men kanska var tað tí, at borgarstjórin í Eiðis kommunu – sum eisini luttók í kappingini – ongantíð áður hevur fingið so góðan mat!

Vit vilja samstundis takka Samkeyp og Sjógæti fyri teirra góða stuðul, sum ger tað møguligt hjá okkum at bjóða luttakarunum góðan mat millum umførini.

Eisini takka vit Jura kaffi, sum stuðlar við at bjóða øllum ókeypis fyrstafloks kaffi alt vikuskiftið. Kaffi kann njótast saman við einum kakubita, sum sjálvboðin baka.

Komið við til Janus Open II – meira enn bara ein talvkapping.